Sir Arthur Conan Doyle ~ The Legend ~

Sang Bujangga Detektif

Lamun urang cumarita genre misteri, utamana carita-carita detektif, pasti wangwangan urang langsung ka salah sahiji tokoh detektif legendaris – Sherlock Holmes, oge jeung nu nyipta ieu tokoh liwat kecap-kecap nu ditulis ku anjeunna, Arthur Conan Doyle. 

Arthur Conan Doyle dibabarkeun ping 22 Mei 1859, di Edinburgh, Skotlandia. Awitna mah dokter pacabakanana teh. Anjeunna nyuprih elmu dina widang kedokteran di Universitas Edinburgh (1876-1881). Sanggeus lulus, Doyle kungsi jadi dokter di hiji kapal nu balayar ka South Africa, nu ahirna anjeunna matuh jeung muka prakter di Plymouth taun 1882. 

Salila muka praktek di Plymouth, teu pati rame teuing dianjangan ku pasen-pasen. Ku kituna loba waktu nu ku anjeunna dimangpaatkeun keur nulis, minangga kalangenanana. Teu lila, Doyle hijrah deui ka Porstmouth, anjeunna beuki produktif nulis nepi ka medal mahakarya nu munggaran, A Study in Scarlet, nu terbit taun 1887. Dina ieu karya tea Sherlock Holmes mimiti diwanohkeun ka dunya.

Sedeng dina taun 1890, Doyle mangkat deui ka Vienna, tujuanana mah keur nyuprih kaelmuan spesialis mata. Anjeunna mulang deui ka London, Inggris, taun 1891, nu terus muka praktek anyar, dokter spesialis mata. Tapi nya kitu deui, praktek dokter spesialis teh langka aya pasenna. Ku kituna waktu keur kalangenanana nulis carita teh beuki loba jatahna. Dina ieu taun oge Doyle geus ngarasa tokoh Sherlock Holmes teh meh dipaehkeun wae, alatan manehna hayang nulis carita nu leuwih ngeusi tur serieus.

Dina taun 1893, Holmes jeung musuhna Profesor Moriarty dicaritakeun dina carita The Final Problem, terjun ka curug. Eta hal ngahudang reaksi negatif ti masarakat nu resep kana carita-carita anjeunna, nu matak Doyle ngalanjutkeun deui lalakon Sang Detektif ku jalan Holmes dicaritakeun ngan api-api nandangan pati. Hasilna, nepi ka kiwari, tokoh Sherlock Holmes ngalalakon dina 4 novel jeung  56 carpon nu kuanjeun dikarang, jeung deui teuing sababaraha kali deui nu ku bujangga lain dianggit kana carita, serial tv, jeung deui film-film nu sukses tayang di sakuliah dunya.

Salian ti carita detektip, anjeunna oge nulis karya-karya sejenna nu lain ti genre novel atawa carpon. Harita jaman Perang Boer di Afrika lalakon Inggris kacida dipiinggis ku masarakat dunya. Anjeunna nulis pamflet  nu judulna The War in South Africa; It’s Cause and Conduct (Perang di Afrika Selatan; Sabab Musababna), oge karya nu dibukukeun judulna The Great Boer War, minangka pamadeganana salaku warga Inggris. Karya nu ngandung propaganda sapertos kieu nu ahirna Doyle kasinugrahan gelar “Knight” nu matak anjeuna dipiwanoh ku urang sararea ku asma Sir Arthur Conan Doyle.

Sir Arthur Conan Doyle mulang ka Mantenna ping 7 Juli 1930, dikurebkeun di Minstead, New Forest, Hampshire. Patungna diadegkeun di Crowborough Cross, di dayeuhna pisan. Sedeng di Picardy Place, Edinburgh, diadegkeun patung Sherlock Holmes, teu jauh ti padumukan asal Sang Bujangga digelarkeun ka alam dunya. 

~bersambung~

(catatan terjemahan sebagai bentuk kekaguman saya pada beliau sebagai penikmat sastra... sumber: majalah Advance vol. 12/2007)